Конкурс малюнкаў у Салігорску

Мерапрыемства набывае характар традыцыйнага -- вось ужо трэці год запар Малады Фронт прапануе салігорцам такую цудоўную магчымасьць. З кожным годам расьце папулярнасьць і падвышаецца якасьць арганізацыі конкурса. Сёлета некаторыя ўдзельнікі сур'ёзна рыхтаваліся, і гэта выявілася ў сапраўдных творах мастацтва на асфальце: князь Альгерд, Чырвоны касьцёл у Менску і выявы нацыянальнага герба "Пагоня" некалькі гадзінаў радавалі мінакоў. Атмасфэра таксама была сьвоточнай: музыка, усьмешкі,таленавітыя малюнкі, дзеці з бацькамі -- тое, што робіцца адметнасьцю конкурса.
--Гэта цудоўна, калі бачыш, што маленькія дзеці бяруць у рукі крэйду і далучаюцца да нас. Мы рады, што можам ствараць сьвята, -- дзеліцца ўражаньнямі Хрысьціна Самойлава.
Як і абяцалі арганізатары, некаторыя аўтары былі адзначаны каштоўнымі прызамі: беларускімі кніжкамі, аўдыёкнігамі, саколкамі. Журы, у склад якога ўваходзілі вядомая паэтаса Ніна Ермалінская і маладафронтавец, рэдактар "Свабоднага Салігорску" Аляксей Валабуеў, вызначылі лепшыя працы. Пераможцам, вось ужо другі раз, стаў Глеб Сандрас, навучэнец БДУ. Другое месца заняла праца "Князь Альгерд" (Шынкевіч Таццяна і Тарянік Аліна), трэцяе месца адпаведна выява "Пагоні".
Напрыканцы конкурсу адзін з арганізатараў Іван Шыла падзякаваў удзельнікам: "Вельмі рады, што гэты конкурс малюнкаў прайшоў у такой незабыўнай атмасфэры. Хацелася б, каб гэты дзень, дзень, калі прымалі дэклярацыю аб Незалежнасьці, запомніўся кожнаму з тут прысутных сонечным, яскравым і сьвяточным".
Ніна Ермалінская таксама падзякавала удзльнікам, за такую выдатную магчымасьць быць удзельнікам сапраўднага сьвята і неаднарозова паўтарыла, што захапляецца творчасьцю маладзёнаў. Аляксей Валабуеў на разьвітаньне запрасіў салігорскую моладзь прыходзіць і ў наступным годзе, назваўшы конкурс "пазытыўным і ўнікальным".
Супрацоўнікі міліцыі паводзілі сябе стрымана, правяраючы пашпарты ў тых, хто фатаграфаваў конкурс.
Праз 5 хвілін пасьля завяршэньня тэрмінова прыбыўшая спэцтэхніка ЖКГ змыла малюнкі.