За два дні Будслаў наведалі больш за 40 тысяч вернікаў

У набажэнстах, якія праходзілі 1-2 ліпеня ў межах урачыстасцяў, прысвечаных Маці Божай Будслаўскай, прынялі ўдзел больш за 40 тысяч чалавек.

У Будслаў прыехалі дзесяткі тысяч пілігрымаў з Менска, Нарачы, Жодзіна, Ракава, Радашковічаў, Вілейкі, Магілёва, Віцебска і іншых населеных пунктаў Беларусі, а таксама з Польшчы, Украіны, Літвы і Расеі. Увечары 1 ліпеня людзі ўзялі ўдзел у вячэрняй імшы перад Будслаўскім касцёлам бернардзінцаў у Мядзельскім раёне Мінскай вобласці.

У сваёй адозве да пілігрымаў мітрапаліт Мінска‑Магілёўскі арцыбіскуп Тадэвуш Кандрусевіч заклікаў удзельнікаў урачыстасцей у Будславе маліцца за візіт Бенедыкта XVI у Беларусь.

Сёлета для ўдзелу ў традыцыйным храмавым свяце 1—2 ліпеня, прысвечаным 10‑годдзю каранацыі абраза Маці Божай Будслаўскай, былі запрошаныя Тадэвуш Кандрусевіч, апостальскі нунцый арцыбіскуп Марцін Відовіч і ўсе каталіцкія біскупы краіны, а таксама духоўныя хоры.

У праграму свята былі ўключаныя ўрачыстыя імшы, Марыйныя няшпары (праслаўленні Ісуса Хрыста і Маці Божай, падчас якіх выконваюцца псалмы), акафіст, пакланенне святым дарам, працэсіі і літаніі да Маці Божай. У свяце бралі ўдзел таксама вернікі грэка‑каталіцкай царквы.

Удзельнікі свята адзначылі 10‑годдзе з дня, калі кардынал Казімір Свёнтак каранаваў папскімі каронамі абраз Маці Божай Будслаўскай, што з’яўляецца прызнаннем яго цудатворнасці.