У Віцебскай вобласці затрыманая партыя галандскай марыхуаны

Супрацоўнікі падпадзяленняў па наркакантролі і процідзеянню гандлю людзьмі МУС, УУС Віцебскага аблвыканкама і Віцебскага РАУС у супрацоўніцтве з праваахоўнымі органамі Нямеччыны перакрылі чарговы канал пастаўкі наркотыкаў.

Як паведамілі ва ўпраўленні інфармацыі і грамадскіх сувязяў МУС Беларусі, у вёсцы Вароны (Віцебскі раён) быў затрыманы аўтамабіль "БМВ", у якім знаходзіліся беларускі кур'ер, нямецкі пастаўшчык і расійскі кіроўца. У машыне з дапамогай спецыяльна навучанага сабакі супрацоўнікі міліцыі выявілі і канфіскавалі 501 г высокаякаснай галандскай марыхуаны. Падчас далейшых аператыўна-вышуковых мерапрыемстваў таксама быў затрыманы арганізатар гэтай злачыннай групы, 28-гадовы грамадзянін Беларусі.

Кошт канфіскаванага наркотыку на чорным рынку складае больш за 15 тыс. долараў ЗША.

Па дадзеных праваахоўных органаў, злачынная арганізацыя займалася пастаўкай марыхуаны, какаіну, гашышу і амфетаміну ў Беларусь і Расію.

Па факце заведзеная крымінальная справа.