У Полацку знайшлі рэшткі будынкаў XVII стагоддзя

Беларускія археолагі знайшлі каля Полацкай езуіцкай калегіі рэшткі будынкаў і збудаванняў XVII стагоддзя. Пра гэта паведамілі ў Інстытуце гісторыі Акадэміі навук.

Сярод знаходак таксама фрагменты керамікі і прылады працы, якія датуюцца XVII стагоддзем. Вывучэнне сабраных прадметаў дазволіць атрымаць больш дакладныя звесткі аб арганізацыі побыту насельніцтва Полацку гэтага перыяду.

У цэлым археалагічныя даследаванні дапамагаюць не толькі атрымоўваць інфармацыю аб жыцці нашых продкаў, але і вызначаць шчыльнасць іх селішчаў, а таксама заканамернасць іх распаўсюджвання па тэрыторыі краіны.

Акрамя таго, атрыманыя звесткі выкарыстоўваюцца пры вывучэнні асаблівасцяў фармавання гісторыка-геаграфічнага ландшафту розных рэгіёнаў Беларусі.