Аляксей Янукевіч: “Зь ініцыятывы БНФ над Эўрапарлямэнтам цэлы тыдзен

Напярэдадні Дня Незалежнасьці 25 сакавіка ў Эўрапарлямэнце ў Стразбуры мае распачацца тыдзень Беларусі. Падчас гэтага незвычайнага мерапрыемства, якое будзе доўжыцца адпаведна сваёй назве тыдзень, адбудзецца блізкае знаёмства эўрапейскіх палітыкаў з культурай і палітыкай Беларусі. Некалькі дзесяткаў грамадзскіх, палітычных і культцрных дзеячаў Беларусі маюць намер узяць удзел у правядзеньні беларускага тыдня ў Эўрапарлямэнце. Падрабязна пра падзею апавядае намесьнік старшыні Партыі БНФ, арганізатар тыдня Беларусі ў Эўрапарлямэце Аляксей Янукевіч.

- Ідэя гэтая дастаткова даўно абмяркоўвалася ў Фронце. Ініцыятарам правядзеньня беларускага тыдня ў Эўрапарлямэнце зь беларускага боку выступіў Вінцук Вячорка. Так склалася, што якраз пасьля таго, як быў абраны новы кіраўнік Дэлегацыі па сувязях зь Беларусьсю Яцэк Пратасевіч з Польшчы, я сам знаходзіўся ў Брусэлі і Стразбуры і меў магчымасьць пазнаёміцца са спадаром Пратасевічам і спрэзэнтаваць яму гэтую ідэю. Ён адразу яе падтрымаў, і з боку Эўрапейскага Парлямэнту менавіта ён выступаў такім маторам, каб гэтая ідэя атрымала падтрымку Эўрапейскай Народнай Партыі (EPP) і Эўрапарлямэнту ў цэлым.

- Я хацеў бы падкрэсьліць, што ўдзельнічае Івонка Сурвіла – старшыня Рады БНР, а таксама яе намесьнік Сяргей Навумчык. Яны афіцыйна запрошаныя на мерапрыемства. Я лічу, што гэта вельмі важна, што прадстаўнікі кіраўніцтва Рады БНР возьмуць удзел. Таксама бяруць удзел ляўрэаты прэміі Сахарава – старшыня БАЖ Жана Ліцьвіна і адзіна кандыдат ад АДС на выбарах 2006 году Аялксандр Мілінкевіч. Таксама будуць прадстаўнікі большасьці беларускіх палітычных партыяў. Запрошаны Павал Севярынец як знакамітая асоба, запрошаная Вольга Казуліна. У рамках тыдня Беларусі прадугледжаная вялікая культурніцкая праграма.

- Культурніцкая праграма займае вельмі значную частку Беларускага тыдня. І нават фармальнае адкрыцьцё гэтага тыдня будзе адбывацца падчас адкрыцьця выставы беларускіх мастакоў. Аляксей Марачкін будзе прэзэнтаваць гэтую выставу. Таксама будзе паказаная фотавыстава беларускіх фатографаў – падзеі палітычных зсаганьняў апошніх гадоў. Якраз на адкрыцьці выставаў будзе распачаты беларускі тыдзень у Эўрапарлямэнце. Распачнуць яго прэзыдэнт Эўрапарлямэнту Ганзгерт Пётэрынг, кіраўнік Эўрапейскай народнай партыі Ёзэф Доўл і кіраўнік Дэлегацыі па сувязях зь Беларусьсю Яцэк Пратасевіч. Зь беларускага боку будуць выступаць старшыня Партыі БНФ Лявон Баршчэўскі, Аляксандр Мілінкевіч. Прадугледжаны канцэрт гурта “WZ-Orkestra” пад кіраўніцтвам Зьмітра Вайцюшкевіча, будзе дэманстравацца фільм Юрыя Хашчавацкага “Беларусь: Назад у Эўропу”. Важнай часткай культурніцкай праграмы будзе прэзэнтацыя беларуска-лацінска-дваццацісямімоўнага слоўніка Лявона Баршчэўскага. Тыдзень Беларусі ў Эўрапарлямэнце -вельмі добрая нагода спрэзэнтаваць гэты слоўнік і падкрэсьліць, што Беларусь паводле ўсіх крытэраў належыць да Эўропы і мусіць разглядацца як будучы сябра Эўразьвязу.

- Асноўнымі пунктамі палітычнай часткі будзе круглы стол з удзелам эўрапейскіх дэпутатаў на тэму “Дэмакратычная Беларусь – неадрыўная частка Эўропы”. Нягледзячы на тое, што Эўрапейскі парлямэнт апошнія гады дастаткова шмат увагі надае сытуацыі ў Беларусі, пра што сьведчыць хаця б прысуджэньне двойчы прэміі імя Сахарава беларусам, гэтая падзея – Беларускі тыдзень у Эўразьвязе – выключная. І вельмі важна, што яна адбываецца менавіта з нагоды 90-ых угодкаў Беларускай Народнай Рэспублікі, якая фактычна адрадзіла і паклала аснову сучаснай беларускай дзяржаўнасьці. Вельмі важна, што ні да якой іншай нагода, а менавіта да ўгодкаў БНР, якая абвесьціла сваімі асноўнымі каштоўнасьцямі дэмакратычную, незалежную Беларусь, прымеркаваны тыдзень у Эўрапарлямэнце. Нягледзячы на тое, што заўсёды вельмі шмат розных імпрэзаў, ёсьць шмат краінаў, шмат групаў інтарэсаў, якія патрабуюць увагі. Фактычна цэлы тыдзень сэсіі ў Стразбургу пройдуць пад знакам беларусі і пад бел-чырвана-белым сьцягам. Ёсьць дамоўленасьць, што будзе ўрачыста ўзьняты і будзе ўвесь гэты час лунаць нацыянальны дзяржаўны бел-чырвона-белы сьцяг над Эўрапарлямэнтам.