Адбыўся тэлемост з Ватыканам

Ствараць цывілізацыю любові , прымаць у жыцьці правільныя рашэньні і дзеяньні, поўныя веры і эвангельскай адвагі, заклікаў студэнтаў беларускіх універсітэтаў Папа рымскі Бэнэдыкт XVI.

Гэты зварот ён прачытаў на беларускай мове 1 сакавіка ў зале Паўла VI у Ватыкане, падчас традыцыйнага штогадовага тэлемаста, у якім упершыню ўдзельнічалі прадстаўнікі беларускай моладзьдзі.

У міжнароднай акцыі "Эўропа і Амэрыкі разам для пабудовы цывілізацыі любові", прысьвечанай VI Эўрапейскаму дню студэнтаў універсітэтаў і прымеркаванай да Вялікага паста, прынялі ўдзел маладыя людзі з Румыніі, Італіі, Францыі, Іспаніі, ЗША, Кубы, Бразіліі, Мексікі, Эквадора і Беларусі.

У звароце да маладых эўрапейцаў і амэрыканцаў Папа рымскі адзначыў: "Бог заклікае да супрацоўніцтва разам з вашымі аднагодкамі ва ўсім сьвеце, каб жыватворчы сок Эвангельля аднавіў культуру абодвух кантынэнтаў і ўсяго чалавецтва. Буйныя эўрапейскія і амэрыканскія мегаполісы становяцца ўсё больш касмапалітычнымі, і часта ім бракуе менавіта гэтага жыватворчага соку, які можа зрабіць так, каб адрозьненьні перасталі быць чыньнікам падзелаў або канфліктаў, а наадварот, былі падставай для ўзаемнага ўзбагачэньня. Цывілізацыя любові і супольнасьці — гэта азначае сумеснае жыцьцё ў духу павагі, сьвету і радасьці, суіснаваньне рознага ў імя ажыцьцяўленнья агульнага пляну, які блаславёны Папа Ян XXIII засноўваў на чатырох слупах: любові , праўдзе, волі і справядлівасьці".

Акцыя трансьляваліся на дзевяць вялікіх плазьменных экранаў, усталяваных у Менскім катэдральным касьцёле найсьвяцейшай Панны Марыі, і суправаджалася сінхронным перакладам на беларускую мову. На калёнах храма былі вывешаныя расьцяжкі з тэкстам: "Беларусь вітае і чакае Сьвятога Айца" у перакладзе на ангельскую, італьянскую і нямецкую мовы. Набажэнства ў касьцёле вялося на лацінскай і беларускай мовах, а некаторыя ўдзельнікі тэлемаста былі апранутыя ў нацыянальныя гарнітуры зь ільну.

Удзел беларускай моладзьдзі ў цяперашнім тэлемасьце ініцыяваны архібіскупам Менска-Магілёўскім мітрапалітам Тадэвушам Кандрусевічам, які зьяўляецца чальцом папскай рады "Справядлівасьць і сьвет".

У акцыі прынялі ўдзел каля пяці тысяч чалавек. Яны размяшчаліся ў нэфах храма, яго цокальнай частцы, а таксама ля ўваходу ў касьцёл. Прысутнічалі каталіцкія іерархі і дэлегацыі з усіх дыяцэзій краіны.

Кульмінацыяй тэлемаста стала ўручэньне Папам прадстаўнікам студэнцтва ў Ватыкане энцыклікі Spe salvi ("Збавеньне праз надзею"), пасьля чаго мітрапаліт Тадэвуш Кандрусевіч у Менску перадаў гэты тэкст сямі маладым людзям.

Пасля тэлемаста студэнты засталіся на ноч у храме, каб у малітве адчуць радасьць сустрэчы са сьвятым бацькам.

Тэрыторыя перад касьцёлам ахоўвалася ўзмоцненымі нарадамі міліцыі. У раёне храма былі заўважаныя аўтазакі.