У Кангрэсе ЗША прадстаўлена прапанова аб новым “Акце аб дэмакратыі”

У Палаце прадстаўнікоў Кангрэсу ЗША была прадстаўленая прапанова аб новым “Акце аб дэмакратыі ў Беларусі”. Абгрунтоўваючы прапанову, дэпутат ад Нью-Джэрзі Крыс Сьміт заявіў, што ад 2004 году, часу, калі быў ухвалены і падпісаны прэзыдэнтам Бушам “Акт аб дэмакратыі ў Беларусі”, сытуацыя з датрыманьнем правоў чалавека ў Беларусі пагоршылася.

“Беларусь – гэта сапраўдная анамалія ў дэмакратычнай, свабоднай Эўропе... Мэта новага “Акту аб дэмакратыі” – паказаць, што ЗША падтрымліваюць незалежнасьць Беларусі і, нягледзячы ні на што, будуць падтрымліваць тых, хто змагаецца за дэмакратыю і правы чалавека”, – заявіў Сьміт.

Згодна з дакумэнтам, прапануецца ў 2007 і 2008 гадох выдаткаваць па 20 мільёнаў даляраў на падтрымку няўрадавых арганізацыяў, праваабаронцаў, незалежных мэдыяў і міжнароднага абмену. Апрача гэтага, праект прадугледжвае выдзяленьне 7,5 мільёнаў даляраў на стварэньне тэлебачаньня і радыё для Беларусі.

Новы “Акт аб дэмакратыі” прадугледжвае таксама ўзмацненьне санкцыяў супраць беларускіх уладаў.

Гэты дакумэнт, каб атрымаць статус закону, павінен быць ухвалены Палатай прадстаўнікоў, Кангрэсам і падпісаны прэзыдэнтам.

Источник: Радио Свобода