Сёння ў Гродне ўтворана Ваўкавыская лакальная кааліцыя Аб’яднаных д�

Прадстаўнікі чатырнаццаці партый і грамадскіх аб’яднанняў Ваўкавыскага, Свіслацкага, Зэльвенскага, Мастоўскага і Бераставіцкага раёнаў Гродзенскай вобласці з чацвёртай спробы ўтварылі лакальную кааліцыюаб’яднаных дэмакратычных сілаў. Тры папярэднія спробы не прывялі да станоўчых вынікаў перш за ўсё таму, што аб’яднанню дэмакратычных сілаў перашкаджалі ўлады.

Тыдзень таму ў Гродне супрацоўнікі міліцыі затрымалі кіраўніка мясцовай філіі Партыі БНФ Сяргея Мальчыка і праваабаронцу Віктара Сазонава, якія накіроўваліся ў Свіслач дзеля правядзення схода. Два тыдні таму трое сутак арышту атрымаў кіраўнік мясцовай суполкі АГП Юрый Істомін. У выніку было прынята рашэнне запрасіць прадстаўнікоў рэгіёнаў у Гродна і тут правесці сход.

На думку старшыні абласной суполкі Партыі БНФ Сяргея Мальчыка, стварэнне абласной кааліцыі АДС павінна перш за ўсё паспрыяць кансалідацыі не толькі палітычных партый, але і ўсяго грамадства дзеля дасягнення пэўных мэтаў:

- Я лічу, што на сённяшні дзень альтэрнатывы аб’яднанню дэмакратычных сілаў няма, таму ў хуткім часе, як бы каму не хацелася, паўстане кааліцыя на Гродзеншчыне.Толькі супольная праца ўсіх неабыякавых людзей можа паспрыяць хуткай перамозе над існуючым рэжымам.

Між тым, на Гродзеншчыне ўтворана тры лакальныя кааліцыі з запланаваных чатырох. Цягам тыдня павінен прайсці сход у Лідзе, пасля чаго адбудзецца выніковая каферэнцыя аб’яднаных дэмакратычных сілаў вобласці.