Напад на актывіста Руху "За Свабоду"

Увечары 2 студзеня ў Пінску ў пад’езьдзе свайго дому быў зьбіты 52-гадовы актывіст Руху “За свабоду” Кастусь Чувак. Міліцыя не хоча караць злодзея.

Са слоў спадара Кастуся, ён ведае ў твар чалавека, які на яго напаў, бо некалькі разоў бачыў яго раней, але асабіста не знаёмы. Калі-нікалі паміж Кастусём і незнаёмцам завязваліся размовы, у тым ліку па палітычных пытаннях. Нападнік ніколі раней не хаваў свайго негатыўнага стаўлення да нацыянальна свядомых грамадзянаў.

У аўторак увечары актывіст Руху у двары свайго дому чарговы раз сустрэў гэтага чалавека. Апошні пачаў абражаць спадара Кастуся і пераследаваў яго да самага пад’езда. Ля ліфту нападнік моцна стукнуў сп. Кастуся па галаве, потым, калі той упаў, біў безабароннага чалавека нагамі. Падчас збіцця ён прыгаворваў: “Можаш ісьці скардзіцца, але табе ніхто не паверыць, бо мяне ў міліцыі і КГБ усе ведаюць, у мяне там добрыя сувязі”.

Да чацвярга стан збітага актывіста не палепшыўся. Ўвечары а 22-й гадзіне Кастусь Чувак выклікаў хуткую дапамогу. З падазрэннем на страсенне мозгу спадара Кастуся шпіталізавалі.

Увечары да пацярпелага ў шпіталь прыйшлі двое следчых, якія паводзілі сябе вельмі дзіўна. У размове, калі спадар Кастусь пачаў апісваць прыкметы злодзея, міліцыянат прагаварыўся, што ведае гэтага чалавека. Інтарэс следчых да справы адразу знік. “Трэба правесьці сьледства, а там пабачым,” – сказаў адзін з аператыўнікаў. Следчы па прозвішчу Місюкавец “міралюбіва” сказаў Кастусю Чуваку: “Ну расказвай, не бойся, я цябе біць не буду, калі што не так скажаш”.

Міліцыянты прынялі заяву, але настойліва рэкамендавалі пацярпеламу не патрабаваць узбуджэння крымінальнай справы. Выглядае, што міліцыя не надта хоча караць злодзея.