Супольнасьць “Трэці Шлях” сардэчна віншуе Вас з новым 2006 годам!

 Дарагія сябры!

Супольнасьць “Трэці Шлях” сардэчна віншуе вас з новым 2006 годам!

Прайшоўшы год прынес нам шмат выпрабаваньняў. Мы пачыналі як непалітычны моладзевы інтэлектуальны праект, падтрымліваючы сайт, арганізоўваючы сустрэчы і інтэрвію з знакавымі асобамі Беларусі. У жніўні нам давялося непасярэдна сутыкнуцца рэпрэсіўнай машынай беларускага рэжыму. Незадаволенасьць улады выклікала старонка сатырычных флэш-мультоў “Мультклюб”. У выніку незаконнай канфіскацыі тэхнікі, праца нашага сайту была паралізаваная на месяц. У кватэрах нашых актывістаў прайшлі ператрусы, некаторыя зь іх былі вымушаныя зьехаць за мяжу Беларусі.

Тым ня меней, мы выстаялі і ўзмацніліся.

У верасьні мы цалкам аднавілі працу нашых сайтаў, зрабілі яе больш устойлівай да атакаў звонку і да масавай наведвальнасьці.

Створаныя новыя рубрыкі сайту – “Навіны” (найцікавейныя актуальныя навіны Беларусі), “Думкарэй” (бягучая падборка аналітычных матар’ялаў, зьявіцца ў он-лайн неўзабаве). Дададзеныя блёкі імпарту інфармацыі “Трэцяга Шляху” ў выглядзе RSS-стужкі і наладжаная трансьляцыя матар’ялаў з сайту ў Livejournal. Рэгулярна абнаўляецца разьдзел “Публікацыі” – намаганьнямі ўласных аўтараў і ў каапэрацыі з праектамі “Наше мнение”, “Студэнцкая Думка”, “Макасін”. Адноўленая праграма падтрымкі новых грамадзкіх інтэрнэт-праектаў байнэта. Новымі кнігамі папаўняецца бібліятэка на сайце “Трэцяга Шляху”, актывізаваўся форум. Ідзе праца над перакладам інтэрфэйсу асноўнага сайту на беларускую мову. Выходзіць і актыўна распаўсюджваецца ў Беларусі “Інфарматар”. Шырыцца колькасьць нашых чытачоў і актывістаў.

Мы дакладна ведаем, што надыходзячы год будзе не такім, як папярэднія. Шмат у чым падзеі гэтага году будуць вызначальнымі для будучыні Беларусі ў наступны пэрыяд часу. Нямала пераменаў прынясе гэты год.

Няхай жа будуць гэта перамены да лепшага!

Мы жадаем усім вам надзеі, жадаем вам веры ў свае сілы, веры ў лепшую будучыню Беларусі!

Мы жадаем вам заўжды ведаць, што нас большасьць, памятаць, што лёс Беларусі толькі ў нашых з вамі руках – і толькі ў нашых з вамі сілах зрабіць, каб чорны пэрыяд гісторыі нарэшце мінуў!

Мы жадаем вам моцы ў барацьбе за праўду. Зло абавязкова будзе пераможанае, мы зробім гэта!

З новым годам! За нашу і вашу свабоду! За нашу і вашу перамогу!

Ваш,
Трэці Шлях