У Варшаве зарэгістравалі моладзевую ініцыятыву „Вольная Беларусь”

У Варшаве моладзевая ініцыятыва „Вольная Беларусь” атрымала рэгістрацыю ды займела статус грамадзкага аб’яднаньня. Цікавасьць выклікае той факт, што сярод заснавальнікаў ды сябраў арганізацыі няма беларусаў, нават этнічных. „Вольная Беларусь” — арганізацыя палякаў, якіх цікавіць барацьба за дэмакратыю ды спрабуюць дапамагчы тым, хто супрацьстаіць дыктатарам.

Чальцы арганізацыі маюць досьвед удзелу ў „аранжавай” рэвалюцыі ва Ўкраіне. Сваё рашэньне ўдзельнічаць у рухах супраціву недэмакратычным рэжымам палякі матывуюць удзелам бацькоў у руху „Салідарнасьці”.

У інтэрвію Рацыі пра пляны „Вольнай Беларусі” распавяла каардынатар праграмы „Уікенд у Польшчы” Агнешка Астроўская:

— Да канца году польская моладзевая арганізацыя мае запрасіць больш за 200 чалавек на сэмінары ды стажыроўкі, што будуць праходзіць у Варшаве штотыдзень у выходныя. Акрамя таго, бліжэйшым часам распачнецца навучаньне маладых журналістаў, якія маюць досьвед працы ў рэгіянальных газэтах. І гэта толькі пачатак — найбольш цікавыя праграмы, мяркуецца, пачнуць рэалізоўвацца пасьля новага году.

На сёньня варшаўская „Вольная Беларусь” налічвае блізка 20 актывістаў, але па словах заснавальнікаў, шэрагі арганізацыі ўвесь час пашыраюцца за кошт студэнтаў аддзяленьня беларускай філялёгіі Варшаўскага ўнівэрсытэту ды тых маладых палякаў, што кантактавалі зь беларусамі прыватна. Шмат хто зь іх вывучыў беларускую мову самастойна, і большасьць цяпер гатовая далучыцца да акцыяў ды праграмаў, арыентаваных на падтрымку дэмакратыі ў Беларусі.

Аляксандар Буракоў

Крыніца: Беларускае Радыё Рацыя